Яким Яша БАКОВ
МОЯ ЖЕМ*
Я любим жиц у своєй жеми
Гоч красши даґдзе шири швет,
И кажди куцик єй окреми
Мнє мили яґод ружа квет.
Я любим жиц у своєй жеми,
Нє дармо лєєм горки зной:
Вше меньши вельки проблеми,
Вше векши з тим заробок мой.
Я любим жиц у своєй жеми:
Цо себе створиш, тото маш,
Владали цудзи ту системи,
А тераз руководзи наш.
Я любим жиц у своєй жеми
Кед придзе одпочивку час:
„Ох, гори, лєси, води нєми,
Як теди я милуєм вас!”
„Я любим жиц, ох, моя жеми,
Я роснуц у Це красни хлоп,
И умрец у Це, моя жеми,
Бо ти мой живот и мой гроб!”
*Яша Баков, Вибрани твори,
Руске слово, Нови Сад, 1983, 22-23.
СМУТНА ПИСНЯ
Наджил свойо я жаданя,
Престал любиц свойо сни;
Мнє остали лєм страданя,
Плоди шерца жалосни.
Под бурями судьби горкей
Спрел квиткови венєц мой;
Жиєм смутни, осамени,
Чекам чежки конєц свой.
Так зоз першим мразом спрети,
Док чуц бурї жимни гвизд,
На конарчку голим чистим
Стреса ше остатнї лїст.
* * *
Вше так будзе и бувало
Таки уж од вика били швет
Учених вельо, мудрих мало,
Знанцох полно, товариша нєт.
1947
* * *
Вельки буц я себе жадам,
Любим руску чесц;
Досц на себе я накладам —
Годзен я то нєсц?
1946