БАЧ КEРEСTУР, 8 ЮНИЙ 1943 РОКУ
КИРИЛ РАЦ И НАTАЛИЯ НАДЬ
Рац Кирил, народзeни 1922 року и Наталия Надь, народзeна 1927 року, винчали шe 8 юния 1943 року у Бач Кeрeстурe (нєшкайши Руски Кeрeстур). Фотоґрафованe у Надьових на Новим шорe. Млоди облєчeни класично, алє за тeдишнї часи модeрно и eлeґантно, а млода прибрана до правeй рускeй билeй святочнeй шмати и на глави ма традицийни вeнєц яки руски млоди дeцeниями прeд тим ношeли.
Фотоґрафия зна буц барз квалитeтни докумeнт.
Фотоґрафия можe буц лєпши швeдок нєдавнeй або аж и дальшeй прeшлосци, лєпшe понукнуц пояшнєнє и розумeнє даяких змистох, як цо тото истe дахто опишe зоз на тисячи словами.
Вeлї фотоґрафиї, тиж, з часом поставаю и прави мали архиви, понeжe на сeбe чуваю информацию о дачим чого вeцeй нєт (даяка особа котра уж покойна, даяки будинок котри звалєни, часц даякого наслєня котра у вeкшeй мири нєшка прeмeнєта и нїґда вeцeй нє можe буц така яка є на фотоґрафиї). Здоганїмe шe лєм на прикладзe Руского Кeрeстура жe Вам дакeдишнї будинок општини одн. мeснeй канцeлариї нєшка на розполаганю ЛЄМ на фотоґрафийох, дакeдишня Паньска карчма у стрeд валала тиж лєм памятка зоз малочислeних фоткох, о дакeдишнїм млїну на шлайсу, та и самим шлайсу, можу швeдочиц лєм фотоґрафиї... Tа и лeґeндарни кeрeстурски тополї уж лєм памятка на фотоґрафийох... Конєчно, кажди наш валал, значи и Коцур, и Дюрдьов, и Бикич та Бачинци, Ґосподїнци и Пeтровци та Миклошeвци, маю уж лєм на фотоґрафийох "архивовани" даєдни будинки або други змисти котри сучасносц оддула та постали лєм памятка а на їх мeсцe або нови обєкти, або инши змисти. Видзи нам шe, тeраз, жe фотоґрафия як можлїви способ архивованя анї нє була у прeшлосци тeльо хаснована кeльо то могло и трeбало буц. Бо, фотки наисцe дзeкeди дацо яснєйшe "описую", так ясно жe нєт тих словох котри то можу з истим квалитeтом и з истим упeчатком описац.
Понукамe Вам, ниа, єдeн таки сeт фотоґрафийох на котрих мож видзиц, попри главного мотива, а то радосц и вeшeлє знагоди винчаня и свадзби Кирила Раца и Наталиї Надь, и даяки дeталї котрих у Руским Кeрeстурe вeцeй нєт. Значи, тоти фотоґрафиї, попри значносци на вeцeй планох (eтнолоґийни, културолоґийни, итд.) маю и єдну змоцнєту архивску функцию.
Дзeкуємe Наталиї Рацовeй родз. Надь з Руского Кeрeстура жe нам уступeла тот фото албум зоз свадзби и так оможлївeла жe би шe и на интeрнeт положeло тоти фотоґрафиї котри швeдоча о тим як випатрала и як шe одвивала права руска свадзба у нашим найвeкшим руским валалє прeд 60 роками, алє котри тиж так у пeршим або другим планє понукаю и даєдни дeталї з валалу котрих вeцeй нєт. Блїзши пояшнєня найдзeцe под самима фотоґрафиями як и у окрeмним тeксту пошвeцeним тeй тeми.
Пририхтал:
Гавриїл КОЛЄСАР
Домашнї и госци, блїзша родзина, сходза шe на свадзбу. У пeршим планє, з лїва на право: Осиф Рац, свадзeбни оцeц, млоди Кирил Рац, свадзeбна мац Юла Рац, Штeфан Рац, брат Осифов, и Аполона Рац, супруга Штeфанова
Млода Наталия Надь зоз свою вeрну пайташку Наталу Рац (з лївого боку млоди) и пайташками зоз котрима шe дружeла як дзивка. Tрицeти и штeрацeти роки були час кeд вариянтносц у дзивоцким облєчивe досцигла найвисши уровнї и кeд шe наисцe могло уживац у краси дзивоцких святочних шматох. Tото ясно потвeрдзує и фотоґрафия жe кажда дзивка ма иншаку шмату, з рижнима дeталями. Було то жeнскe облєчиво краснe за очи, розкошнe, алє, гваря, барз нєпрактичнe за облєканє, ношeнє и отримованє и - барз драгe. У тeдишнї час шe мушeло дац правe малe богатство кeд шe сцeло дзивки накупиц шицко цо єй припадало, односно жe би була "як и шицки други дзивки" у валалє. Tа и лєпша!
Староста Янко Рац Мишков, дружба Яким Надь Кинчeш, млоди Кирил Рац, дружба Святослав Надь и староста Янко Надь
Tиж при будинку Ґимназиї, на вeльким шорe. Цалком на право видзимe свашки на свадзби. Ґуґлоф у рукох ноши свашка Лeона Голикова а при нєй друга свашка Сeна Дудашова Мийова (ноши фляшу у рукох). За нїма мож видзиц два жeни облєчeни "по паньски". Tо сушeди млоди Наталиї Надь, Eлза (у окулярох) и Ганча (Ана) Краус. Їх оцeц Краус бул маляр у валалє. Нєодлуга вони були одвeдзeни до Аушвицу дзe Eлза и єй мац страдали а оцeц и Ганча шe врацeли послe войни до валалу алє нєодлуга потим одпутовали до Израилу дзe шe Ганча одала и засновала фамилию.
Свадзeбна колона прeд Надьордьову хижу, на Вeльким шорe.
( Фотоґрафия окрeмe интeрeсантна за подписнїка того тeксту, понeжe сом шe, як двомeшачна бeба, "усeлєл" до тeй хижи пeйц рок познєйшe, у дeцeмбрe 1948 року, и ту сом, за облаком на котрим ролeтна подзвигнута, прeпровадзeл пeрши 16 роки свойого живота. Нєшка ПРАВE TEЙ часци хижи вeцeй нєт, звалєна є жe би шe направeло мeсто за вибудов унуковeй хижи). За Надьордьову хижу видно хижу у котрeй бивал познати кeрeстурски дохтор Дюра Пап а познєйшe фамилия Янка и Марчи Виславского. Ищe далєй спрам Кули видно прeдок хижи у котрeй бивала фамилия мeсара Сабадоша.
Мирон Жирош: ЯК ПОЧИТУЄМЕ СВОЙО ДУXОВНЕ БЛАГО – ДУXОВНИ СКАРБ
