Фотоґрафия з роботнї Янка Арта. Тот керестурски фотохронїчар вжал мотив у нєпостредней блїзкосци керестурского шлайса (шлайс ту, такой на право), гац опрез бандуровей хижи, при гаци ладя а видно и ушорене купалїще хторе у тей нагоди крашнє послужело рибарови як добре рибарске место.   Фотоґрафию зме достали од Яника Гардия Емушки зоз Нємецкей.

 

 

Фотоґрафия хтора вжата скоро зоз истей позициї як и горня, лєм угел знїманя иншаки та през конари видно конєц бандуровей хижи. Ту и ладя, правда иншака як на предходней фотоґрафиї. Обєктив лапел и двох хлопох - Джуня и Янко Медєши. Фотоґраф бул Янко Медєши, Руски Керестур

 

 

Фотоґрафоване зоз мосцика над базеном а спрам нововибудованей брани односно у напряме сиверу, спрам старого желєзнїцкого моста прейґ беґеля медзи Вепровачом и Филїповом

 

Ище єдна колор фотоґрафия керестурского беґеля зоз 60-тих рокох. Беґель ше пресцера на сивер, а у чамцу Михайло Будински Пинтер и нєпозната особа.   Фотка зоз архиви М. Будинския, Канада

 

 

Яни Гарди Емушков и його оцец Янко Гарди шедза на мурику базeнчка хтори служел як розводнїк води з беґелю спрам Конопарнї на вепровацкей драги. Базенчок бул при такволаней Хижки до хторей бандур, чувар гаци, одкладал свой алат. При хижки, иншак, було єдно з популарнєйших местох за купанє. Фотоґрафоване скорей 1965. року.   Фотоґрафию зме достали од Яника Гардия Емушки зоз Нємецкей.

 

 

 

А ту и фотоґрафия базeнчка хтори служел як розводнїк води з беґелю спрам Конопарнї на вепровацкей драги. Базенчок бул при такволаней Хижки. Фотоґрафию зме достали од Яника Гардия Емушки зоз Нємецкей.

 

Стандардни випатрунок тей часци Малого бачкого беґеля, значи од шлайсу на сивер. Желєни, досц зароснути беґель, полни калапох и другей веґетациї хтора, вимераюци, шеда на дно и прето канал вше плїтши и плїтши. Медзитим, и нєшка то єдна красна оаза мира дзе витрик колїше над и дзе мож чуц красне чвиринканє птицох у природним амбиєнту.

 

 

 

 

Зоз керестурского базену видно гет далєко на сивер високи желєзнїцки мост. Одходзели зме там патриц кед преходзел гайзибан и, познєйше, шинобус зоз Червинки до Филїпова. А лєм пар шмелши керестурски хлапчискове ше усудзовали скочиц з нього до беґелю. Єден з нїх бул и Юлин Сивч Катрина. То попатрунок на мост з югу, од Керестура. Нєдалєко од нього, на другим боку беґеля, була Жобрача гора.   Фотку зме достали од Владимира Кирди зоз Нового Саду

 

 

Так нєшка випатра тот дакеди горди и за нас нєзвичайни мост... ардзави, без шинох, запущени, помали умера на ногох...   Фотку зме достали од Владимира Кирди зоз Нового Саду

 

 

Попатрунок на мост, нєшка, зоз сиверу, з напряму одкаль беґель приходзи до Руского Керестура.   Фотку зме достали од Владимира Кирди зоз Нового Саду

 

Єдна шумна фотка беґеля пред самим змерком. Автор нєпознати, алє направел добру фотоґрафию.

 

 

Ище єдна майсторска фотоґрафия Мариї Дорошки зоз Руского Керестура. Можебуц є дакус и дорабяна у Фотошопу, алє є красна бо представя змирени вечарши беґельски мотив.   Фотоґрафию зме "пожичели" зоз фейсбук бока Мариї Дорошки з Р. Керестура. Кед треба, врациме ю :)

 

 

Кед же ВИ маце даяки фотоґрафиї керестурского шлайса и беґеля, або кед знаце дакого же ма - помогнїце нам же бизме до тих фотоґрафийох дошли и же бизме их обявели на тих бокох вязаних за историю, за прешлосц беґеля хтори єден час бул центер велїх збуваньох и активносцох младих Керестурцох.. Дзекуєме Вам напредок!!!