БИОҐРАФИЯ
ВЛАДИМИР ДОРОҐГАЗИ народзени 13. фебруара 1962. року у Дюрдьове.
Закончел уметнїцку школу “Боґдан Шупут” у Новим Садзе, одсек за дизайн.
Мал вецей самостойни вистави у Сербиї (Дюрдьов, Нови Сад, Сокобаня) и єдну у Минхену (Нємецка).
Участвовал на вецей заєднїцких виставох у Сербиї и иножемстве (Горватска, Мадярска).
Єден є од сновательох подобовей колониї у Дюрдьове и Ґосподїнцох, а тиж так и Дзецинскей подобовей колониї у Ґосподїнцох у рамикох Стретнуца руских школох.
Стаємни є учаснїк подобовей колониї “Шаjкашки дани”, а у иножемстве у Осиєку – Альмас, Петровци, Опатия (Горватска), Микогаза (Мадярска).
Идеї за малюнки бере зоз “дакедишнїх валалох” хтори вецей нє постоя у реалносци, односно, вони лєм носталґични здогадованя. Приказує нє лєм дакедишнї амбиєнт валала, алє и ситуациї у хторих ше находзел натрапени валалски чловек, и тот богати и тот худобни, од вчасного рана по глїбоку ноц. Його малюнки ше находза у приватних збиркох у Сербиї, Нємецкей, Италиї, Мадярскей, Горватскей, Французкей, Австралиї, Канади, Австриї и Анґлиї.
Нєшка роби як шлєбодни уметнїк, у твореню найчастейше хаснує малярски технїки олєй на платну и пастел.
ГУТОРЕЛИ О МНЄ...
Природа и импресия слунка, бависко шветлосци и розлични интервали циню. Вони вше були инспирация за малярох, а особлїво за гевтих хтори вишли зоз комфору ателєа и зоз своїм польовим штафелайом и малярским прибором рушели до природи уживаюци у єй чаривносци правяци малюнки и змагаюци ше з одредзенима феноменами хтори лєм природа може викреировац. Вшелїяк же у тим руху преднячели Импресионисти и Постимпресионисти. Вельо часу прешло и вон детерминовал рижни нови напрями и тенденциї хтори пробовали неґировац традицийни приступ и малярски поступок. Єден спомедзи велїх хтори твардо веря и почитую тоти вредносци то и Владимир Дороґгази, маляр войводянскей ровнїни, салашарох циньових улїцох, парастох у полю зоз рижнима етнолоґийнима предметами хтори характеристични за войводянске поднєбє. Малярски поступок и ремеселнїцка дошлїдносц, манифестована през веризем, вшелїяк указую же тот уметнїк прешол добру школу и же при ньому нє постої импровизация, алє єдна вира до того цо роби и запровадзує. Лєгкосц зоз хтору Дороґгази твори чувствує ше у тематики хтора наративна и прозаїчна а хтору вон схопно и шмело формує до своєй фабули заобиходзаци шицки замки того способу мальованя хтори можу буц контрапункт. Богатство колориту зоз меру формоване естетски и подобово до змистох хтори нам презентує Владимир вшелїяк же су ґаранция за будучносц. Треба лєм дакус пречисциц тему та оддвоїц и акцентовац важне од нєважного цо у процесу роботи тот уметнїк вшелїяк ма у оглядзе. Дороґгази жанровски маляр и то його щире опредзелєнє хторому вон безгранїчно вирни. Дїло того уметнїка заслужує респект и почитованє, процес дозреваня спомалшени и безконєчни а Владимир праве уходзи до тей фази ошлєбдзени од шицого, од деструкциї и корчу хтори присутни у тим нєпредвидзуюцим чаше.
Стева Павков
академски маляр
- Сцерпезлїво, витирвало и поведли бизме зоз вельким довирийом до себе, унапрямени на тото цо зоз своїм малярством сце повесц, Владимир Дороґгази скоро трицец роки виградзує свою уметнїцку визию. А гутори нам вше ознова и ознова одкаль зме и, же гоч дзе пойдземе, ми зоз собу до швета однєшеме тот запах узретого жита и тото окрипенє з кантички кислого млєка цо так глїбоко укоренєне до нашого єства - визначела Ирина Гарди - Ковачевич на отвераню самостойней вистави Владимира Дороґгазия у новосадским Студию "М".
Предлужуюци бешедовац о Владимировим малярстве Ирина наглашела його статус шлєбодного уметнїка, яка то нєшка шмелосц, котра шведочи же то нє гоби цо ше му пошвецує шлєбодни час, алє сам живот. Його роботи розшати по цалей Европи, преплївали два океани, сцигли до Сиверней Америки и Австралиї, кадзи оталь пошли людзе шлїдзаци свойо сни, а остали жадни стварносци у котрей ше одховали.
- Тоту свою жажду гаца зоз Дороґгазийовима пейзажами и приповедками символично приказанима зоз фарбами у хторих преовладує фарба глїни, узретого жита, желєнїдла у молги праху, чи памяткох, кажде най себе бере як зна - гварела надихнуто отвераюци виставу Ирина Гарди-Ковачевич.
If you need info about paintings or about price of paintings if you want to buy some of them feel free to email Mr. Doroghazi email or make a contact at his selling website
Кед же вам потребни информациї у вязи малюнкох або информациї о цени истих, у случаю же сце ше опредзелєли купиц даєден малюнок, шлєбодно контактуйце зоз В. Дороґгазийом на email або нащивце його предайни вебсайт
On the page named Plane / на бок "Ровнїна"
