ЖОВТА ПРИЧАСЦ

 

 

Жовкаве чоло. Жовта пелюха.

И жовч насущна по венох плїва.

Зоз чаши златней проскурка суха

зоз ню ше горко до цела злїва.

 

То тота скора цо жиє з нами,

то тото лїсце у нашим оку,

то власка тота под пазухами,

то зуб прахняви на каждим боку.

 

Жовкнєме мирно як слуте пруце

и жовте, жовте у нас на сласци,

аж по остатнє жовте здихнуце

пред глїну жовту власней причасци.

 

 

 

 

ВРЕДЗЕЛО ПОЖИЦ

 

 

Роя ше роки як шива хмара

цо ше як ренда на нїтки точи.

Риднє у жренкох туня керпара

кед ардза часу начина очи.

 

Роя ше роки як сити пчоли

кед мед з баґренох на яр сцицаю,

як по купаню дзецочка голи

ґомбульки з мидла кед надувая.

 

Як соль ше спекли роки печаци,

як шплях засхнути на склу погара,

яґод пацерки зоз скла швицаци

кед прибераю амрел дротара.

 

Точи ше ренда по шивим нєбе

и рой страцени до клїтки збера.

Пре тоту ренду, гоч лєм о хлєбе,

вредзело пожиц за кратке вчера.

 

 

 

 

 

 

ХУСТКА

 

Погласкай з хустку мудросц сови

цо пильно стреже мешачка шлїд,

уроку галов, сну дєплови,

билому рану чарни вид.

 

Прежегнай нїтком драгу длугу,

покрейтку билу, били вред.

Запровадз погляд попод дугу,

налятей жажди, горки мед.

 

Розплєтай ройтом гадваб рани,

русалков покров, мриї дих.

Нє пейґлай раном боль зорвани

за били ноци чарни грих.

 

Застанов драгох ґузли живи,

ялових ноцох били рой.

На билей шиї квиток дзиви.

На билей дланї жимни зной.

 

Погласкай зоз ню квети крадом,

малженскей ноци габи смак.

У нєй мой отров, крига лядом.

Я билей хустки чарни спак.

 

 

 

 

 

 


ЗБЕГНЬОВСКИ НОЦИ



Там дзе ше нєбо ґу жеми хиля,
там дзе розквита желєна рута,
дзе окраїску прибрана хвиля
палї зорнїчку з писню когута,

там дзе вечарши роша пацери,
там дзе мешачок гвиздочку бочка,
дзе зрею кайси у сну мацери
под цеплу слизу за єй синочка.



Рефрен

Збегньовски ноци, били лелиї
у ваших першох мой крочай дзвинї.
Спод ваших стрехох на моєй шиї
ланцущок з писнї дзивей ґестинї.

Збегньовски ноци, били лебеди,
ваша ме доля ґу нєбу спина
у билей ноци, спод билей греди,
дзе ше мамочка модлї  за сина.



Там дзе ше пиши сладка ягода,
там дзе ваґаши до шерца лєжу,
дзе мацерова кайса як млода
за котру мойо памятки стрежу.

Там дзе прибрани сни з маковини,
там дзе ше ластар до пняку враца
блїщи ше око милей долїни
дзе слизом роса памятку враца.

 

 

 

The Top of the Page / На початок того боку