Зоз "Народного календара" за 1922. рок зме превжали тоту фотоґрафию керестурского шлайса. Предпостаяме же настала 1921. року кед тот Календар пририхтовани. Зоз фотоґрафиї мож видзиц облєчиво особох хтори блїжей ґу сликерови, як и околїско шлайса хторе ше познєйше досц пременєло. Сликер висликовал главну часц шлайса зоз обидвома капурами и дереґлю у штред шлайса. То значни фотодокумент за архиву о керестурским беґелю и шлайсу.

Пред вами єдна з найкрасших фотоґрафийох керестурского шлайса. Сликер вифотоґрафовал комплетни обєкт а при тим нашол, за тедишнї условия и можлївосци, найлєпшу позицию зоз южного боку шлайса. Сликоване под добрим природним ошвиценьом и зоз, очиглядно теди квалитетнєйшим фотоапаратом хтори на филм чи фотоґрафску плочу знял ясно и найменши деталї шлайса. Фотку послал Василь Дороґхази, Р. Керестур

Ище єдна удатна документарна фотоґрафия шлайсу. Автор єй Янко Арт. Сликер знїмал обєкт од позициї юг, югозаход, од половки шлайса. Видзиме комплетну першу (сиверну) капуру шлайса и шицки елементи хтори були вязани за функционованє шлайса. Фотку послал Янко Гарди Емушка, Нємецка

 

 

 

 

 

Ту ище єдна красна, ясна фотоґрафия керестурского шлайса, односно, сиверней часци шлайса. Автор фотоґрафиї Янко Медєши. Ясно видно металну ограду на капури и длугоку греду хтора, поцагнута з окремним мотовидлом, отверала шлайс. Ту и окремни обєкт на муриску шлайса хтори служел же би ше отверало водоцек канала спрам бочного крутила хторе було, предпоставяме, у функциї 'сиґурносного вентила'. Була то часц шлайса хтора ридко хаснована алє мушела провадзиц кажди шлайс пре безпечносни обставини, у случаю високих водостойох и подобних екстремнєйших справованьох води. Конструкторе на шицко думали.

Тиж єдна стандардно добра и илустративна фотоґрафия сиверней часци керестурского шлайса. Фотоґрафоване зоз позициї сиверо-заход и крашнє видно капуру спрам крутила, потим сиверну капуру на шлайсу и даскельо особи хтори преходзели прейґ нєй (тота капура мала даскельо дзешатки преходнїкох дньово понеже шицки Керестурци цо мали жем спрам Водици та аж по Жобрачу гору преходзели тадзи на бициґлох або пешо). Млада жена цо стої на право то Аґафия Гафка Рамач родз. . Вона стої на муричку хтори бул лїви бок гротла за уход беґельскей води до млїну-воденїци на шлайсу. Вода з вельку моцу виходзела до такволаного Лонґова. Фотку послал Василь Дороґхази, Р. Керестур

 

 

 

 

 

 

 

Тота фотоґрафия то звекшани деталь зоз предходней фотоґрафиї. Моцнєйши хлопи на бициґлох нє ґурали бициґли по досц узких дескох на капур - вони, єдноставно, як прави моцаки, дзвигли бициґлу горе и так, з ню понад глави, прешли по верху капури. Нам, слабучким хлапчиком, оставало лєм завидзиц им на моцних рукох и ми и далєй мушели бициґли так ґурац же зме, зоз целами, на даєдних часцох капури вишели над глїбоку воду у шлайсу алє бициґла мушела преходзиц по сиґурней часци дражки. Нєдайбоже же би спадла до шлайсу - хто би ю, вец, отамаль вицагнул на мурянє. Ноги однїмало од страху кед шлайс бул празни а ви над нїм вишице и помали предрилюєце бициґлу помедзи металней огради и механїзма хтори на капури отверал долнї облачки же би ше шлайс полнєл зоз воду бо сцигла даяка дамферка зоз Боґоєва.

 

 

 

 

 

Пред вами три фотоґрафиї керестурского шлайса у фарбох. Автор шицких тих фотоґрафийох Микола Корпаш, иншак наш познати и популарни шпивач. Вон штредком 60-тих рокох приходзел на купанє до Керестура у єдней нагоди, з далєй, вифотоґрафовал южну часц шлайса зоз комплетну капуру. У каждим случаю то єдна з ридших колор фотоґрафийох шлайса, голєм затераз. Фотку послал Микола Корпаш, Н. Сад

 

 

 

 

Микола Корпаш направел и тот знїмок южней капури на шлайсу, з блїзшей позициї и з майсторским чувством за деталї. Так тоти красни керестурски качки, хтори уживали у плїткей води тей часци структури шлайса (то фотоґрафоване вироятно уж после копаня канала Дунай-Тиса-Дунай кед часц канала од тей капури та по широке на новим каналу, нєдалєко од Ризкаши, уж було преглїбене и спущело уровень води нательо же ше шлайс вецей нє могло хасновац за його основну функцию а то транспорт рижних робох и материялох на ладьох и шлепох по цалей длужини Малого бачкого канала) овиковичени занавше на Корпашовим колор слайду. Мож ту видзиц и єден деталь хтори вше прицаговал увагу нас, дзецох, а то моцни млаз води хтори вилєцовал з даякей дзирки хтору час направел на долнєй часци капури. Фотку послал Микола Корпаш, Н. Сад

 

 

 

 

Дзекуюци Миколови Корпашови маме знїмок южней шлайсовей капури и зоз того угла. Микола од горе, зоз бочного шлайсового мура, вифотоґрафовал скоро цалу капуру на хторей при дну видно спомнути млаз води хтори вибива пре моцни прицисок понеже на верх фотоґрафиї мож видзиц, понад саму капуру, же шлайс наполнєти зоз воду. Фотку послал Микола Корпаш, Н. Сад

 

 

Вилєт на беґель учителя Владимира Малацка зоз школярами бул нагода за фотоґрафованє а, источасно, так настал и єден побочни фото документ шлайса. Бо, на тей фотки досц добре видно випатрунок южней часци такволаного крутила, часци керестурского шлайса хтора служела як єдна файта сиґурносного вентила самому шлайсу односно беґелю. Од штред шлайса, там дзе була хижка за алат, водзела драга по гаци зоз вельку препусну пайпу аж на восточне побрежє беґеля од валалу. По тей драги могли присц векши превозки на сам шлайс. Тота часц конструкцийно була у составе шлайса а нєшка вона комплетно загарнута. Жридло одкаль нам сцигла тота фотоґрафия нєпознате.

 

 

 

 

Красна, та мож повесц аж и прекрасна фотоґрафия цалого шлайсу кед ше патри зоз сиверу. Добра, оштра фотоґрафия на хторей видно тоту часц шлайса, а на право видно и скоро цали будинок млїна-воденїци зоз гротлом до хторого уходзела вода хтора обрацала млїнски камень и, потим, виходзела долу до Лонґова. Цо вецей, там за гацу мож видзиц и даскельи хижи хтори пред тим вибудовани у тей часци споза беґеля. То єдина фотоґрафия на хтору зме достали а на хторей кельо-тельо видно млїн-воденїцу. Жридло одкаль нам сцигла тота фотоґрафия нєпознате.

 

 

 

 

Кед нє маме фотоґрафию на хторей видно ЦАЛИ млїн-воденїцу вец, ниа, маме уметнїцки малюнок на хторим крашнє видно цали-цалючки будинок спомнутого млїна. Автор малюнка Мирон Колошняї. Фотку послал Мирон Жирош, Мадярска

 

 

 

 

Идуца тема о беґелю тота:

 

Беґель спрам Ризкаши (на юг од шлайсу)